രാവിലെ ശ്രീ. ഭാസ്കരൻ, ശ്രീമതി സുജാത അന്തർജനം എന്നിവരുടെ നേതൃത്വത്തിൽ കുട്ടികൾ യോഗ പരിശീലനം നടത്തി.

പ്രഭാതഭക്ഷണത്തിനുശേഷം ഏഴാം ക്ലാസ് വരെയുള്ള കുട്ടികൾക്ക് നിർമ്മിതി എന്ന പേരിൽ പ്രവൃത്തിപരിചയക്ലാസിന് ശ്രീമതി അംബിക കല്ലായി, കീർത്തി കല്ലായി, ശിവപ്രിയ ചെപ്പില്ലം എന്നിവർ നേതൃത്വം നൽകി. മുതിർന്ന കുട്ടികൾക്കായി ഒരുക്കിയ ആചാരവും വിശ്വാസവും ശാസ്ത്രവും എന്ന വിഷയത്തിലെ സംവാദം ശ്രീ. പ്രശാന്ത് ബാബു കൈതപ്രം, ഡോ. ഈശ്വരൻ ഇ. എൻ. ശ്രീ. എ. വി. ഉണ്ണികൃഷ്ണൻ നമ്പൂതിരി, ശ്രീ. ടി. വി. മാധവൻ നമ്പൂതിരി എന്നിവർ നയിച്ചു.

ചർച്ചയിൽ സജീവമായി പങ്കെടുക്കാനും സദസ്സിനാകെ ആവേശം പകർന്ന ചോദ്യങ്ങൾ ഉന്നയിക്കാനും കുട്ടികൾ മിടുക്ക് കാണിച്ചു.

ഉച്ചക്ക് ശേഷം തിടമ്പ് നൃത്തം – ചരിത്രവും അവതരണവും, ക്ഷേത്രാചാരങ്ങൾ, നമ്മുടെ ഗൃഹങ്ങളിലെ അനുഷ്ഠാനങ്ങൾ എന്നീ ക്ലാസുകൾ യഥാക്രമം ശ്രീ. ഉപ്പിലി വാദ്ധ്യാൻ ഗോവിന്ദൻ നമ്പൂതിരി, ശ്രീ. കാനപ്രം ഈശ്വരൻ, ശ്രീമതി ശ്യാമള ടീച്ചർ എന്നിവർ നയിച്ചു. കൊച്ചുകുട്ടികൾക്ക് ശ്രീമതി അജിത ടീച്ചറുടെ നേതൃത്വത്തിൽ പ്രത്യേകക്ലാസുകൾ നൽകി.

വൈകുന്നേരം ഒന്നര കി. മീ. അകലെ തൃക്കുറ്റ്യേരി കുന്നിലേക്ക് 125 ഓളം പേരുടെ സംഘം പദയാത്ര ചെയ്തു. തൃക്കുറ്റ്യേരി അമ്പലത്തിനു മുന്നിലുള്ള മനോഹരമായ തടാകത്തിൻ്റെ കരയിലിരുന്ന് കുട്ടികൾ പ്രകൃതി അമ്മയാണ് എന്ന വിഷയത്തെ അടിസ്ഥാനമാക്കി ശ്രീ. ഭാസ്കരൻ വെള്ളൂർ നടത്തിയ ക്ലാസ്സ് ശ്രവിച്ചു. തുടർന്ന് തടാകത്തിനു ചുറ്റും കൈകോർത്തു നിന്ന് പ്രകൃതിസംരക്ഷണം എൻ്റെ ധർമ്മമാണ് എന്ന പ്രതിജ്ഞ ഏറ്റുചൊല്ലി. സന്ധ്യക്ക് അമ്പലത്തിലെ ദീപാരാധന തൊഴുത ശേഷം കുന്നിറങ്ങി വാസുദേവപുരം ക്ഷേത്രത്തിൽ നടത്തിയ നിറമാലയിൽ പങ്കുചേർന്നു.

അത്താഴത്തിന് ശേഷം കുട്ടികൾ വിവിധ കലാപരിപാടികൾ അവതരിപ്പിച്ചു. സ്കിറ്റുകളും ക്ലാസിക്കൽ നൃത്തരൂപങ്ങളും മറ്റുമായി സദസ്സിനെ മുഴുവൻ ആസ്വാദനത്തിന്റെ പാരമ്യത്തിൽ എത്തിക്കാൻ കൊച്ചുകലാകാരന്മാർക്ക് സാധിച്ചു.