നിയുക്ത ശബരിമല മേൽശാന്തിക്ക് സ്വീകരണം

SRSYPRD: 122/2022
06/11/2022

പ്രിയപ്പെട്ടവരേ,

നിയുക്ത ശബരിമല മേൽശാന്തിയായി ചുമതലയേൽക്കുന്ന ബ്രഹ്മശ്രീ. കൊട്ടാരം ജയരാമൻ നമ്പൂതിരിക്ക് ശ്രീരാഘവപുരം വലിയമ്പലത്തിൽ നവംബർ ഏഴാം തീയതി സ്വീകരണം നൽകുവാൻ തീരുമാനിച്ചിട്ടുണ്ട്. വൈകുന്നേരം ദീപാരാധനക്ക് ശേഷമാണ് പരിപാടി.

തന്ത്രവിദ്യാപീഠത്തിൽ അഭ്യസിച്ചതിനു ശേഷം ജ്യോതിഷത്തിലും വാസ്തുവിഷയത്തിലും നല്ല പരിജ്ഞാനം നേടി ഈശ്വരോപാസന ചെയ്യുന്ന അദ്ദേഹത്തിന് ധർമ്മശാസ്താവിൻ്റെ പാദപൂജ ചെയ്യാനുള്ള അവസരം ലഭിച്ചതിലുള്ള സന്തോഷം ഈയവസരത്തിൽ പങ്കുവെക്കും.

സനാതനധർമ്മപോഷണാർത്ഥം ശ്രീരാഘവപുരത്തു സഭായോഗം പുനരുജ്ജീവിപ്പിച്ചതു മുതൽ അതിൻ്റെ അഭ്യുദയകാംക്ഷിയായി പ്രവർത്തിച്ചുവരുന്ന ജയരാമൻ നമ്പൂതിരി അമ്പലത്തിലും പാഠശാലയിലും നേരത്തെയും വന്നിട്ടുണ്ട്. കഴിഞ്ഞ വർഷം പെരിയാട്ട് ശ്രീകൃഷ്ണൻ മതിലകത്ത് സഭായോഗം നടത്തിയ മഹാവേദഭജനത്തിലും അദ്ദേഹം പങ്കുചേർന്നു.

മിഴിവാർന്ന പ്രഭാഷണങ്ങളിലൂടെ ഹൈന്ദവ സമൂഹത്തിന് അറിവുപകരുകയെന്ന മഹത്തായ സേവ കൂടി ദീർഘകാലമായി ചെയ്തുവരുന്ന ജയരാമൻ നമ്പൂതിരിക്ക് ശ്രീരാമസ്വാമിയുടെയും ശ്രീബദരീനാഥന്‍റെയും അനുഗ്രഹം എന്നുമുണ്ടാകട്ടെ എന്ന് പ്രാർത്ഥിക്കുന്നു.

ഭഗവദർപ്പണമായി,
വാരണക്കോട് ഗണപതി നമ്പൂതിരി
ട്രസ്റ്റി, ശ്രീരാഘവപുരം.