ബ്രഹ്മശ്രീ. കല്ലായി പെരികമന വിഷ്ണുനമ്പൂതിരി: ഭക്തിയും ഭാഷയും സമന്വയിച്ച കർമ്മയോഗി

ഓതിക്കൻ കല്ലായി പെരികമന ശ്രീധരൻ നമ്പൂതിരിയുടെയും കരിങ്കുഴി നീലമനയിലെ മകൾ സുവർണ്ണിനി അന്തർജനത്തിന്റെയും മകനായി 1935 സെപ്റ്റംബർ (1110 കന്നിമാസം) അനിഴം നക്ഷത്രത്തിലാണ് വിഷ്ണുനമ്പൂതിരി ജനിച്ചത്. വിഷ്ണു നമ്പൂതിരി എന്നതായിരുന്നു ഔദ്യോഗിക നാമമെങ്കിലും ‘മായ മാഷ്’ എന്ന പ്രിയപ്പെട്ട പേരിലായിരുന്നു അദ്ദേഹം നാട്ടിൻപുറങ്ങളിലും ബന്ധുജനങ്ങൾക്കിടയിലും അറിയപ്പെട്ടിരുന്നത്. പണ്ഡിതശ്രേഷ്ഠരായ കല്ലായി നാരസിംഹൻ നമ്പൂതിരി, ശങ്കരൻ നമ്പൂതിരി എന്നിവർ ജ്യേഷ്ഠന്മാരും സരസ്വതി അന്തർജനം സഹോദരിയുമാണ്.

അധ്യാപന ജീവിതം

ചെറുതാഴം എൽ.പി. സ്‌കൂൾ, ചെറുകുന്ന് ഗവ. ഹൈസ്‌കൂൾ എന്നിവിടങ്ങളിലെ വിദ്യാഭ്യാസത്തിന് ശേഷം തലശ്ശേരിയിൽ നിന്ന് ടി.ടി.സി പൂർത്തിയാക്കി പിലാത്തറ എ.യു.പി സ്‌കൂളിൽ അധ്യാപകനായി ഔദ്യോഗിക ജീവിതം ആരംഭിച്ചു. പെരിയ, തളിപ്പറമ്പ് മാവിച്ചേരി, മാതമംഗലം, രാമന്തളി, ശ്രീകണ്ഠാപുരം, മാടായി എന്നിവിടങ്ങളിലെ സേവനത്തിന് ശേഷം 1974 മുതൽ 1989 വരെ കൊട്ടില ഗവ. ഹൈസ്‌കൂളിൽ മലയാളം അധ്യാപകനായി പ്രവർത്തിച്ചു. മലയാളഭാഷയുടെ മാധുര്യം അനേകം ശിഷ്യർക്ക് പകർന്നു നൽകിയ അദ്ദേഹം 1989-ൽ വിരമിച്ചു.

ആദ്ധ്യാത്മികയാത്രയും ഭാഗവതപ്രഭാവവും

ഭാഗവത പണ്ഡിതനായിരുന്ന മുത്തശ്ശൻ കല്ലായി വലിയ വിഷ്ണുനമ്പൂതിരിയിൽ നിന്നാണ് അദ്ദേഹം ആദ്ധ്യാത്മികതയുടെ ആദ്യപാഠങ്ങൾ അഭ്യസിച്ചത്. 1976 മുതൽ കൊമ്പങ്കുളം ഈശ്വരൻ നമ്പൂതിരിയോടൊപ്പം ചേർന്ന് ഭാഗവതപ്രചാരണത്തിന് തുടക്കമിട്ടു. പിന്നീട് കേരളത്തിനകത്തും പുറത്തുമായി നിരവധി ക്ഷേത്രങ്ങളിൽ തന്റേതായ ശൈലിയിൽ ഭഗവദ് കഥാകഥനം നടത്തി അദ്ദേഹം പ്രശസ്തനായി. അതിയടം ശ്രീകൃഷ്ണസ്വാമി ക്ഷേത്രത്തിൽ 35 വർഷത്തിലധികം തുടർച്ചയായി സപ്താഹം നടത്താൻ സാധിച്ചു എന്നത് അദ്ദേഹത്തിൻ്റെ ആത്മീയ ജീവിതത്തിലെ വലിയൊരു നിയോഗമായിരുന്നു.

കുടുംബം

കൈതപ്രം കണ്ണാടി ഇല്ലത്തെ ദ്രൗപദി അന്തർജനമാണ് ഭാര്യ. മക്കൾ: ലേഖ അന്തർജനം (പാനൂർ കണ്ണംമ്പള്ളി ഇല്ലം), ശ്രീവിദ്യ അന്തർജനം (ഇരട്ടയിൽ മന, പട്ടാമ്പി), ജഗദീഷ് ശ്രീധർ (ഓഡിറ്റർ, സഹകരണവകുപ്പ്, കാഞ്ഞങ്ങാട്)

ജഗദീഷ് ശ്രീധർ ശ്രീരാഘവപുരം സഭായോഗം കല-സാംസ്കാരിക വിഭാഗത്തിലും പ്രോഗ്രാം മാനേജ്മെൻ്റ് വിഭാഗത്തിലും പ്രമുഖസ്ഥാനങ്ങൾ വഹിച്ചുവരുന്നു.

വ്യക്തിമുദ്രയും പുരസ്‌കാരങ്ങളും

അതിയടം ശ്രീകൃഷ്ണ സ്വാമി ക്ഷേത്രം, അയ്യപ്പൻ കാവ് എന്നിവിടങ്ങളിൽ പ്രസിഡന്റായി അദ്ദേഹം സേവനമനുഷ്ഠിച്ചിട്ടുണ്ട്. ഭാഗവതയോഗം സമിതിയുടെ ‘ആചാര്യ വന്ദനം’ അവാർഡ്, അതിയടം ശ്രീശങ്കരഭഗവദ് പാദ വേദവിദ്യാകേന്ദ്രത്തിൻ്റെ ‘ഭാഗവതോത്തമ പുരസ്കാരം’ എന്നിവ അദ്ദേഹത്തിന് ലഭിച്ചിട്ടുണ്ട്.

91 വർഷക്കാലം നീണ്ടുനിന്ന കർമ്മബഹുലമായ ജീവിതത്തിനൊടുവിൽ 2026 ഫെബ്രുവരി 2-ന് (വെളുത്തവാവ്, തൈപ്പൂയ്യ നക്ഷത്രത്തിൽ) അദ്ദേഹം വിഷ്ണുപാദം പൂകി.

വിഷ്ണുനമ്പൂതിരിയുടെ (മായ മാഷ്) വിയോഗത്തിൽ ശ്രീരാഘവപുരം സഭായോഗം ആഴത്തിലുള്ള ദുഃഖം രേഖപ്പെടുത്തുകയും അദ്ദേഹത്തിൻ്റെ ആത്മാവിന് നിത്യശാന്തി നേർന്ന് പ്രണാമം അർപ്പിക്കുകയും ചെയ്യുന്നു.